من رباعيات العملاق الكبير جاهين

خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت و الا الحياه ؟

عجبي !!!

ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!

ياما صادفت صحاب و ما صاحبتهمش

و كاسات خمور و شراب و ما شربتهمش

أندم علي الفرص اللي انا سبتهم

و الا علي الفرص اللي ما سبتهمش

عجبي !!

و الكون ده كيف موجود من غير حدود

و فيه عقارب ليه و تعابين ودود

عالم مجرب فات و قال سلامات

ده ياما فيه سؤالات من غير ردود

عجبي !!!

أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!

يا باب يا مقفول ... إمتي الدخول

صبرت ياما و اللي يصبر ينول

دقيت سنين ... و الرد يرجع لي : مين ؟

لو كنت عارف مين أنا كنت أقول

عجبي !!!

شكرا جزيلا على هذا المجهود
فعلا كل مرة بتأكدى على حبك لصلاح جاهين المبدع
وستنى المزيد من رباعياته الحلوة
وفيه رابعية حلوة كان بقول فى بدايتها
يا طير ياطاير فى السما طظ فيك...اوعى تفكر ربنا مصطفيك
يا ريت لو عندك تبقى تكتبيها

ان شاء الله هحاول اجيبهالك واجيب بقيت الرباعيات ان شاء الله

شكرا جزيلا على الاهتمام